کراچی (پاک صحافت) پاکستان پیپلز پارٹی کے رہنما سابق وزیر اعظم یوسف رضا گیلانی نے کہا ہے کہ پارٹی چیئرمین بلاول بھٹو نے بھارت میں جو بات کی وہ پاکستان کا مؤقف ہے۔ اس موقع پر انہو ں نے یہ بھی کہا کہ بلدیاتی انتخابات میں کامیابی پر امیدواروں کو مبارکباد پیش کرتا ہوں، عمران خان کے تین جلسوں کے باوجود میرا بیٹا کامیاب کیسے ہوا۔
تفصیلات کے مطابق کراچی میں میڈیا سے گفتگو کرتے ہوئے سابق وزیر اعظم یوسف رضا گیلانی نے کہا کہ عوام کو سیاسی استحکام پیدا ہونے کے بعد ریلیف ضرور ملے گا، سیاسی استحکام کے بعد ہی معاشی استحکام ہوگا۔ ان کا کہنا ہے کہ ملکی سیاسی تاریخ میں متفقہ وزیرِ اعظم بنا ہے، ہم نے اٹھارہویں ترمیم، گلگت بلتستان اور کے پی کو شناخت دی۔
واضح رہے یوسف رضا گیلانی نے مزید کہا کہ تمام صوبوں میں الیکشن ایک روز ہونے پر اتفاق ہو چکا تھا۔ ان کا کہنا ہے کہ قومی اسمبلی چھوڑ کر اور صوبائی اسمبلی توڑ کر غلطی کی گئی، مذاکرات مشروط نہیں ہوتے، بات سلجھانی ہو تو بیٹھ کر بات کرنا ہوتی ہے۔ پیپلز پارٹی کے رہنما نے کہا کہ آئین کے مطابق اگر وقت پر کوئی عمل نہیں ہو سکا تو اس میں گنجائش موجود ہے۔