کراچی (پاک صحافت) شرجیل میمن کا کہنا ہے کہ آئندہ الیکشن میں مقابلہ سندھ میں نہیں بلکہ وسطی پنجاب میں ہوگا۔
تفصیلات کے مطابق پاکستان پیپلز پارٹی (پی پی پی) کے رہنما شرجیل میمن نے پریس کانفرنس سے خطاب کرتے ہوئے کہا ہے کہ آنے والا سال پیپلز پارٹی کا سال ہوگا۔ پیپلز پارٹی کی سندھ حکومت نے بہت کام کیے ہیں، جبر و ظلم برداشت کیے لیکن میدان کبھی نہیں چھوڑا۔ سیاسی قائد کا کام ہوتا ہے کہ وہ ہمیشہ عوام میں رہے، ماضی کی روایتیں سب کے سامنے ہیں۔ اقتدار میں وہی جماعتیں آئیں گی جو عوام کے درمیان ہوں گی۔
شرجیل میمن کا مزید کہنا تھا کہ سندھ میں ایس آئی یو ٹی جیسے رول ماڈل اسپتال موجود ہیں۔ انہوں نے پنجاب میں ایک اسپتال تک نہیں بنایا۔ پی ٹی آئی حکومت نے ملک کا بھٹہ بیٹھا دیا تھا۔ سندھ میں برسات کے موقع پر آنے والے ہمیشہ لوٹ جاتے ہیں۔ مسلم لیگ (ن) کو صرف الیکشن میں سندھ یاد آتا ہے۔
انہوں نے کہا کہ آج اسلامی ٹچ کی باتیں کرنے والا کہاں گیا؟ ہم نہیں چاہتے 2024 میں کوئی شخص ملک پر تھوپا جائے۔ نااہل جماعتوں کو عوام مسترد کردیں گے۔ عوام کی رائے کے بعد کوئی نااہل ملک پر نہیں تھوپا جائے گا۔ پیپلز پارٹی کی حکومت نے ملک میں تاریخی کام کیے ہیں۔ بلاول بھٹو نے ملک کو پہچان دی ہے۔