صوابی (پاک صحافت) وفاقی وزیر انجینئر امیرمقام نے کہا کہ بیرون ملک مقیم پاکستانیوں نے بانی کی کال کو مسترد کردیا، اوورسیز پاکستانیوں نے ریکارڈ ترسیلات زر بھجوائیں۔
تفصیلات کے مطابق جلسے سے خطاب کرتے ہوئے وفاقی وزیر انجینئر امیر مقام نے کہا ہے کہ عوام نے پی ٹی آئی کی انتشار کی سیاست کو مسترد کردیا، بانی پی ٹی آئی نے گالم گلوچ کے کلچر کو پروان چڑھایا، عوام مسلم لیگ (ن) کی قیادت سے بہت محبت کرتے ہیں۔
امیر مقام کا مزید کہنا تھا کہ ہم باتوں پر نہیں عملی اقدامات پر یقین رکھتے ہیں، ہماری قیادت نے ہمیں عوام کی خدمت کرنا سکھایا ہے، عوام کی خدمت کا بھرپور جذبہ رکھتے ہیں۔ چھوٹا لاہور کے عوام کے تمام مسائل حل کریں گے، خیبرپختونخوا کی حکومت نے عوام کے مسائل حل نہیں کیے۔
انہوں نے کہا کہ مسلم لیگ (ن) تعمیر و ترقی کا دوسرا نام ہے، وزیراعظم شہباز شریف نے ملک کو ڈیفالٹ سے بچایا، حکومتی اقدامات کی بدولت مہنگائی میں نمایاں کمی ہوئی ہے۔