فیصل آباد (پاک صحافت) رانا ثناءاللہ کا کہنا ہے کہ امید ہے رواں سال کے مالی بجٹ سے ملک معاشی بحران سے باہر نکل آئے گا۔
تفصیلات کے مطابق وزیراعظم کے مشیر اور مسلم لیگ (ن) کے رہنما رانا ثناءاللہ نے کہا ہے کہ عید کے موقع پر اہل پاکستان کو مبارکباد پیش کرتا ہوں، اس مبارک موقع پر اللہ پاکستان پر اپنا فضل و کرم کرے۔ ملکی معیشت استحکام کی جانب گامزن ہے، قوم دعا کرے ملک اب کسی حادثے سے دوچار نہ ہو۔ پارلیمنٹ 30 جون سے قبل بجٹ پاس کرے گی، حکومتی اخراجات میں کمی لائی جائے گی، میاں شہباز شریف کی قیادت میں وفاقی حکومت پاکستان کو معاشی دلدل سے نکالنے میں لگی ہوئی ہے۔
رانا ثناءاللہ کا مزید کہنا تھا کہ 18-2017 میں ہونے والی سازش کی وجہ سے پاکستان کا ناقابل تلافی نقصان ہوا، رواں سال بڑی محنت اور جدوجہد کے ساتھ آئی ایم ایف کے ساتھ وہ معاہدے کئے گئے جس سے عام آدمی کی زندگی زیادہ متاثر نہ ہو۔ آئندہ سال انہیں دنوں میں جب ہم نیا بجٹ لا رہے ہوں گے تو یہ پریشانیاں بھی حل ہو چکی ہوں گی اور معاشی استحکام بھی آئے گا، پنجاب حکومت مریم نواز کی قیادت میں امان و امان کی صورتحال میں بہتری لارہی ہے۔
انہوں نے کہا کہ عام آدمی کی روزمرہ کی ضروریات پر دھیان دیا جا رہا ہے، آٹے، روٹی سمیت دیگر بنیادی اشیاء کی قیمتیں کم کی جا رہی ہیں، گندم اور آٹے کی قیمت میں تو واضح بہتری آئی ہے، پٹرولیم مصنوعات کی قیمتیں بھی کم کی گئی ہیں جس سے صورتحال میں بہتری آئے گی۔