لاہور (پاک صحافت) پنجاب اسمبلی میں افواج پاکستان کی خدمات اور قربانیوں کو خراج تحسین پیش کرنے کی قرارداد منظور کر لی گئی۔
تفصیلات کے مطابق پنجاب اسمبلی اجلاس کے دوران قرارداد صوبائی وزیر برائے پارلیمانی امور مجتبی شجاع الرحمان نے پیش کی۔ قرارداد کے متن میں لکھا گیا کہ پنجاب اسمبلی کا یہ ایوان افواج پاکستان کے شہدا و غازیوں کو زبردست خراج تحسین پیش کرتا ہے، افواج پاکستان بحری و سرحدی حدود کے علاوہ نظریاتی سرحدوں کی بھی حفاظت کررہی ہیں، میدان جنگ میں فتح اور شکست کے فیصلے اسلحہ چلانے والوں کے حوصلے بلند کرتے ہیں، تاریخ بزدلوں کو نہیں بہادروں کو یاد رکھتی ہے۔
متن کے مطابق قائد اعظم محمد علی جناح نے دفاع میں اسلحہ کی اہمیت نہیں بلکہ پاک افواج کے عزم و حوصلہ اور استقامت کی ضرورت پر زور دیا، پنجاب اسمبلی کا ایوان مسلح افواج کو وطن عزیز کےلئے دی جانے والی قربانیوں پر انہیں خراج عقیدت پیش کرتا ہے، پاک فوج ہمیشہ مشکل وقت میں قوم کے شانہ بشانہ کھڑی ہوتی ہے قوم کی توقعات پر پورا اتری ہے۔
پنجاب اسمبلی میں پیش کی گئی قرارداد میں لکھا گیا کہ پاک افواج کے شاہینوں نے ہمیشہ قوم کا سر فخر سے بلند کیا ہے، ہمارے فوجی جوان جذبہ شہادت سے سرشار اور وطن کے لئے موت کو گلے لگانے کےلئے ہمہ وقت تیار رہتے ہیں، یہ ایوان پاک افواج کے مسلح شہیدوں اور غازیوں کو خراج عقیدت و تحسین پیش کرتا ہے، پاک افواج قوم کے ماتھے کا جھومر ہیں۔