اسلام آباد (پاک صحافت) امیر مقام کا کہنا ہے کہ خیبرپختونخوا میں اساتذہ کے مسائل حل کرنے کے بجائے انہیں معطل کیا جا رہا ہے۔
تفصیلات کے مطابق وفاقی وزیر انجینئر امیر مقام نے کہا ہے کہ علی امین گنڈاپور کی باتوں کو سنجیدہ نہیں لینا چاہیے، خیبرپختونخوا کے ہزاروں اساتذہ اپنے حقوق کے لیے باہر نکلے، اساتذہ سے یکجہتی کا اظہار کرتے ہیں۔ اساتذہ کے حقوق کے لیے ان کا ساتھ دیں گے، خیبرپختونخوا حکومت انتشار پھیلانے کے سوا کچھ نہیں کر رہی، ان کے پاس کارکردگی بتانے کے لیے کچھ نہیں۔
امیر مقام کا مزید کہنا تھا کہ احتجاج کرنے والے اساتذہ کو خیبرپختونخوا حکومت دھمکیاں دیتی ہے، وزیراعلی خیبرپختونخوا احتجاج کے لیے سرکاری وسائل استعمال کرتا ہے، خیبرپختونخوا ہاؤس ہم سب کا ہے اس کو دہشت گردوں کا گڑھ نہ بنائیں۔
انہوں نے کہا کہ پی ٹی آئی والے کہہ رہے ہیں ٹرمپ آگیا ان کا کام ہوگیا، پی ٹی آئی والوں کو خام خیالی ہے، امریکا میں کوئی بھی صدر بنے وہ ریاست کی پالیسی کو آگے لے کر چلتا ہے۔