کراچی (پاک صحافت) گورنر سندھ کامران ٹیسوری نے کہا ہے کہ بانی پی ٹی آئی صرف مس کالیں دے رہے ہیں، ابھی پانچ سال تک ان کی کالیں نہیں ملنے والی ہیں۔
تفصیلات کے مطابق گورنر سندھ کامران ٹیسوری نے کہا ہے کہ پی ٹی آئی والے گول گول گھوم کرواپس وہیں جائیں گے جہاں سے آئے تھے، یہ سیاسی، جذباتی اور آخری اوور کا گیم ہے، اس کےبعد اوور ختم ہوجائےگا، ان کی باتوں سے فرسٹریشن ظاہر ہوتی ہے۔ بشری بی بی کے بیان کو ان کی اپنی پارٹی نے بھی اون نہیں کیا اگر بانی نے بشری بی بی سے ایسی کوئی بات کی ہے تو حلف توڑا ہے۔
کامران ٹیسوری کا مزید کہنا تھا کہ اگر کچھ ہوا بھی تھا تو بانی پی ٹی آئی نے بطور وزیراعظم راز افشا نہ کرنے حلف اٹھایا ہے، اگر بانی پی ٹی آئی نے بشری بی بی سے ایسی کوئی بات کی ہے تو حلف توڑا ہے۔ اگر یہ سب بہت سی باتوں کو جوڑ کر رہے ہیں تو یہ ملکی خودمختاری و سالمیت کے خلاف ہے۔
انہوں نے کہا کہ پاکستان معاشی استحکام کیلئے کوششیں کر رہا ہے، دوست ممالک ساتھ ہیں، پی ٹی آئی والے جو بھی کریں گے وہ نہ دوست ممالک کو پسند آئے گا نہ ہی پاکستانی عوام کو پسند آئے گا۔