جنوبی پنجاب (پاک صحافت) جنوبی پنجاب میں ایک دن میں آسمانی بجلی گرنے سے اموات کی تعداد 21 ہوگئی ہے، جاں بحق ہونے والوں میں 9 مرد، 5 خواتین اور 7 بچے شامل ہیں۔
پروونشل ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق آسمانی بجلی گرنے کے واقعات مظفر گڑھ، رحیم یار خان، راجن پور، لودھراں، بہاولپور اور بہاولنگر میں پیش آئے۔ آسمانی بجلی گرنے سے بہاولنگر میں 3، بہاولپور میں 3، رحیم یار خان میں 9، مظفر گڑھ میں ایک، راجن پور میں ایک، کوٹ ادو میں ایک اور لودھراں میں 3 افراد جان سے گئے۔
ترجمان پی ڈی ایم اے کا کہنا ہے کہ آسمانی بجلی کی وجہ سے 5 افراد زخمی بھی ہوئے، ڈی جی پی ڈی ایم اے عرفان علی کاٹھیا نے زخمیوں کو بہترین طبی امداد فراہم کرنے اور جاں بحق افراد کے لواحقین کی مالی معاونت کی ہدایات جاری کردیں۔
عرفان علی کاٹھیا کا کہنا ہے کہ انسانی جانوں کے ضیاع پر بے حد افسوس ہے، قدرتی آفات کا مقابلہ مل کر اور باہمی تعاون سے ہی ممکن ہے۔
ڈی جی پی ڈی ایم اے نے اپیل کی کہ شہری خراب موسم کی صورتِ حال میں احتیاطی تدابیر اختیار کریں اور طوفانی بارشوں اور بجلی کی گرج چمک کے دوران محفوظ مقامات پر رہیں۔