مظفر آباد (پاک صحافت) آزاد کشمیر میں انتخابی مہم کا آج آخری روز ہے، الیکشن کمیشن کی رپورٹ کے مطابق الیکشن مہم آج رات 12 بجے ختم ہوجائے گی۔ دوسری جانب الیکشن کمیشن کی درخواست پر آئین کے آرٹیکل 245 کے تحت آزاد کشمیر میں پاک فوج طلب کرلی گئی ہے۔
تفصیلات کے مطابق وزیر اعظم عمران خان آج تراڑ کھل اور کوٹلی میں چیئرمین پیپلز پارٹی بلاول بھٹو زرداری باغ اور مظفر آباد میں جبکہ مسلم کانفرنس کے سردار عتیق دھیر کوٹ میں انتخابی جلسوں سے خطاب کریں گے۔ خیال رہے کہ آزاد کشمیر میں انتخابات کے لئے 25 جولائی کو دنگل ہوگا۔
واضح رہے کہ آزاد کشمیر کے تینتیس حلقوں میں بارہ بڑے مقابلے متوقع ہیں۔ سابق وزرائے اعظم، سیاسی جماعتوں کے سربراہان اور وزارت عظمیٰ کی دوڑ میں شامل امیدواروں کے درمیان تگڑے مقابلوں کا امکان ہے۔ آئی ایس پی آر کے مطابق فوجی جوان 22 سے 26 جولائی کے دوران ’کوئیک رسپانس فورس‘ کے طور پر تعینات ہوں گے۔