لاہور (پاک صحافت) شہباز شریف کا کہنا ہے کہ ہم آزاد فلسطینی ریاست کے قیام تک فلسطینیوں کی حمایت کرتے رہیں گے۔
تفصیلات کے مطابق پاکستان مسلم لیگ (ن) کے صدر شہباز شریف نے غزہ میں نہتے فلسطینیوں پر اسرائیلی بمباری کی سخت الفاظ میں مذمت کرتے ہوئے کہا ہے کہ عالمی برادری فلسطینیوں کے حقوق کا تحفظ یقینی بنائے ورنہ دنیا راکھ کا ڈھیر بن جائے گی، صیہونی ریاست دہائیوں سے نہتے فلسطینیوں کی نسل کشی کر رہی ہے۔
شہباز شریف کا مزید کہنا تھا کہ اسپتالوں کو خالی کروانا اور صحافیوں کو نشانہ بنانا قتل عام کی اجازت دینے کے مترادف ہے، سات دہائیوں سے ایک قابض فوج فلسطینیوں پر بدترین مظالم ڈھا رہی ہے۔ سلامتی کونسل اپنی قراردادوں پر عملدرآمد کرواتی تو آج یہ حالات پیدا نہ ہوتے۔
انہوں نے کہا کہ سلامتی کونسل اپنی قراردادوں پر عملدرآمد کروائے تاکہ بے گناہوں کا بہتا لہو روکا جاسکے۔ او آئی سی فلسطینیوں کے لیے پانی، خوراک، ادویات کی فوری فراہمی شروع کرے، تمام اسلامی ممالک او آئی سی کے پلیٹ فارم سے امدادی سرگرمیوں میں حصہ لیں۔
رہنما ن لیگ کا کہنا تھا کہ بے گھر فلسطینیوں کے لیے پناہ گاہوں کی فراہمی کے لیے ہنگامی اقدامات کیے جائیں۔ موجودہ حالات اسلامی دنیا کا بھی امتحان ہے، القدس الشریف دارالحکومت کی حامل آزاد فلسطینی ریاست کے قیام تک فلسطینیوں کی حمایت کرتے رہیں گے۔