گوجرانوالہ (پاک صحافت) وفاقی وزیر اطلاعات عطاء اللہ تارڑ کا کہنا ہے کہ آج پی ٹی آئی دس حصوں میں تقسیم ہوچکی ہے، اس پارٹی نے ہمیشہ نفرت اور لوٹ مار کی سیاست کی۔
گوجرانوالہ میں کارکنوں سے خطاب کرتے ہوئے عطا تارڑ نے کہا کہ حکومتی اقدامات سے معیشت درست سمت میں گامزن ہے، مسلم لیگ ن نے ہمیشہ عوام کی خدمت کی، نواز شریف کی قیادت میں ملک کو ہمیشہ بحرانوں سے نکالا۔ وزیر اطلاعات نے کہا کہ ہماری حکومت نے ملک کو دیوالیہ ہونے سے بچایا، پوری دنیا کے مالیاتی ادارے پاکستان کی آج تعریف کر رہے ہیں، وزیر اعظم نے دن رات محنت کرکے ملک کی معیشت کو استحکام دیا۔
عطا تارڑ نے کہا کہ بانی پی ٹی آئی نے 190ملین پاؤنڈ کی ڈکیتی کی، پی ٹی آئی نے ملک کو بہت نقصان پہنچایا، یہ وہ لوگ تھے جنھوں نے پاکستان کی بہتری کے لیے ایک اینٹ نہیں لگائی۔ انہوں نے مزید کہا کہ پی ٹی آئی نے اپنے دور حکومت میں ملکی ترقی کا سفر روکا، ہم 28 مئی والے ہیں 9 مئی والے نہیں۔