لاہور (پاک صحافت) آئی جی پنجاب نے غیرقانونی مقیم افراد کے انخلاء کے حکومتی فیصلے پر من و عن عمل کروانے کا اعلان کیا ہے۔
تفصیلات کے مطابق آئی جی پنجاب ڈاکٹر عثمان انور کی زیر صدارت سنٹرل پولیس آفس میں آر پی اوز اور ڈی پی اوز کا اہم اجلاس ہوا۔ اجلاس میں گفتگو کرتے ہوئے انہوں نے کہا ہے کہ پنجاب میں غیرقانونی طور پر مقیم غیرملکی شہریوں کے انخلاء کے پلان کو حتمی شکل دے دی گئی ہے، اداروں کے ساتھ مکمل رابطے میں ہیں، 3 نومبر سے پنجاب بھر میں مرحلہ وار غیرقانونی مقیم تارکین وطن کے انخلاء کا آغاز ہوگا، راولپنڈی، سرگودھا، گوجرانوالہ، شیخوپورہ، لاہور، فیصل آباد، ساہیوال، ملتان، بہاولپور اور ڈیرہ غازی خان ڈویژن سے غیرقانونی مقیم شہریوں کا انخلاء ہوگا۔
آئی جی پنجاب ڈاکٹر عثمان انور کا مزید کہنا تھا کہ غیرقانونی مقیم غیرملکیوں کو مخصوص پوائنٹس سے پنجاب کی حدود سے باہر منتقل کیا جائے گا، غیرقانونی مقیم شہریوں کو منتقلی کے عمل کے دوران ہولڈنگ پوائنٹس پر رکھا جائے گا، منتقلی کے لئے ٹرانسپورٹ، لاجسٹکس، کھانے پینے سمیت دیگر انتظامات متعلقہ ضلعی انتظامیہ کی ذمہ داری ہوگی۔
آئی جی پنجاب نے پولیس افسران کو ہدایت کی کہ غیرقانونی مقیم غیرملکی شہریوں کے پنجاب سے انخلاء کے دوران سیکیورٹی ہائی الرٹ رکھی جائے۔