اسلام آباد (پاک صحافت) اتحادی حکومت کو معاشی بحران سے نمٹنے کے لئے بڑی کامیابی مل گئی، آئی ایم ایف نے پاکستان کیلئے 6 ارب 50 کروڑ ڈالر کا قرض منظور کرلیا ہے۔
تفصیلات کے مطابق آئی ایم ایف کی جانب سے پہلی قسط میں پاکستان کو ایک ارب 10 کروڑ ڈالر دیئے جائیں گے، اعلامیہ جاری کر دیا گیا ہے۔ آئی ایم ایف کے اعلامیے میں قرض پروگرام میں جون 2023 تک توسیع کی منظوری دے دی گئی ہے۔ آئی ایم ایف بورڈ نے پاکستان کو تقریباً ایک ارب 17 کروڑ ڈالر جاری کرنے کی منظوری دی اور قرض کی یہ رقم آئی ایم ایف کی جانب سے اسی ہفتے پاکستان کو منتقل کر دی جائے گی۔
اعلامیہ میں مزید کہا گیا ہے کہ پاکستان کی معیشت کو چیلنجز درپیش ہیں، پاکستان کو توانائی کے نقصانات کم کرنا ہوں گے اور ٹیکس آمدنی بڑھانا ہوگی، پاکستان کو مارکیٹ کی بنیاد پر ایکس چینج ریٹ یقینی بنانا ہوگا، کاروبار کرنے کا ماحول بہتر بنا کر پائیدار ترقی کو یقینی بنایا جاسکتا ہے اور مہنگائی پر قابو پانے کے لیے شرح سود میں اضافہ بہتر اقدام ہے۔ پاکستان کو سماجی شعبے میں تحفظ اور حکومتی ملکیتی اداروں کی کارکردگی کو بہتر بنانا ہوگا۔ حکومت پاکستان نے بگڑتے مالی اور بیرونی حالات بہتر کرنے کیلئے اہم اقدامات کیے، حال ہی میں منظور کردہ بجٹ پر عمل درآمد ترجیح ہونی چاہیے۔