لاہور (پاک صحافت) آئی جی پنجاب ڈاکٹر عثمان انور کا کہنا ہے کہ پنجاب میں الیکشن سیکیورٹی کے انتظامات مکمل ہیں۔
تفصیلات کے مطابق آئی جی پنجاب عثمان انور نے کہا ہے کہ الیکشن 2024ء کے پر امن انعقاد کیلئے الحمدللہ پنجاب پولیس تیار ہے، پاکستان کے تمام قومی ادارے پر امن اور شفاف انتخابات کو یقینی بنا رہے ہیں۔ انتخابی عمل میں گڑبڑ کرنے والوں کے خلاف بلا تفریق سخت قانونی کارروائی ہوگی۔
ڈاکٹر عثمان انور کا مزید کہنا تھا کہ قانون ہاتھ میں لینے والے افراد سے آہنی ہاتھ سے نمٹیں گے، تمام لا انفورسمنٹ ایجنسیز، آرمڈ و سول آرمڈ فورسز الیکشن کروانے جا رہے ہیں۔ الیکشن کے دوران لڑائی جھگڑے کا خطرہ موجود رہتا ہے، انتخابی ضابطہ اخلاق کی خلاف ورزی کی قطعی اجازت نہیں۔
آئی جی پنجاب نے کہا کہ پنجاب پولیس نے این آر ٹی سی کے ساتھ مل کر انتہائی حساس اور حساس پولنگ سٹیشنز پر کیمرے نصب کر دیے ہیں، انتخابی میٹریل والی جگہوں پرسی سی ٹی وی کیمرے مانیٹرنگ کیلئے موجود ہیں۔