جیکب آباد (پاک صحافت) پاکستان میں پہلی بار ایک ہندو گھرانے سے تعلق رکھنے والی خاتون ڈی ایس پی کے عہدے تک پہنچنے میں کامیاب ہوگئیں، ذرائع کے مطابق جیکب آباد سے تعلق رکھنے والی منیشا مل نامی لڑکی سی سی ای امتحان پاس کر سندھ پولیس میں ڈی ایس پی کا عہدہ حاصل کرنے میں کامیاب ہوگئی۔
تفصیلات کے مطابق صوبہ سندھ کے پسماندہ ضلعے جیکب آباد سے تعلق رکھنے والی ایک ہونہار ہندو لڑکی نے محنت کے ذریعے اعلیٰ سرکاری عہدے تک پہنچ کر ملک بھر کی خواتین کیلئے بہترین مثال قائم کی ہے۔ خیال رہے کہ ملک میں یہ پہلا موقع ہے جب کوئی ہندو لڑکی پولیس کے شعبہ میں ڈی ایس پی کا عہدہ حاصل کرنے میں کامیاب ہوئی ہیں۔
واضح رہے کہ ہندو گھرانے سے تعلق رکھنے والی ہونہار خاتون منیشا مل کو تمام تر مشکلات کے باوجود ایسی شاندار کامیابی حاصل کرنے پر ملک بھر کے شہریوں کی جانب سے مبارکباد دیتے ہوئے کہا جا رہا ہے کہ یقینی طور پر منیشا مل کی کاوشیں تمام خواتین کیلئے ایک بہترین مثال ہیں اور دیگر خواتین بھی اپنی محنت اور کوشش سے اپنے ہدف تک باآسانی پہنچ سکتی ہیں۔