لاہور (پاک صحافت) وفاقی وزیر اطلاعات مریم اورنگزیب نے کہا ہے کہ عمران خان میڈیا کا معاشی قتل کرنے والا مجرم ہے۔ انہوں نے عمران خان کے میڈیا سیمینار کو منافقت قرار دیتے ہوئے کہا ہے کہ میڈیا دشمن کس منہ سے میڈیا سیمینار کروا رہا ہے شرم آنی چاہیے۔
تفصیلات کے مطابق مریم اورنگزیب نے اپنے جاری کردہ بیان میں کہا کہ عمران خان نے وزیراعظم کی کُرسی پر بیٹھ کر میڈیا دشمنی کی، عمران خان کا دور میڈیا کے لئے سیاہ دور تھا، عمران خان صاحب جھوٹے کرپٹ فارن ایجنٹ میڈیا دشمن اور منافق ہیں۔ ان کا کہنا تھا کہ میڈیا کو فیصلہ کرنا ہے کہ میڈیا کے خلاف نیب کو استعمال کرنے والا اور پاکستان میڈیا ریگولیٹری اتھارٹی کے بانی کے میڈیا سیمنار میں جانا ہے کہ نہیں۔
واضح رہے کہ مریم اورنگزیب نے مزید کہا کہ چار سال میڈیا کا قتل کرنے والا، میڈیا سیمینار کرنے کا تماشہ نہ کرے، میڈیا کو کمزور کرنے کے لئے میر شکیل الرحمان کے نیب گردی کی، پی ایف یو جے، سی پی این ای اور پی بی اے کو فیصلہ کرنا ہوگا کہ میڈیا کو کمزور کرنے والے کے سیمینار میں جانا ہے کہ نہیں۔ مریم اورنگزیب نے کہا کہ صحافت کا قتل، صحافیوں کو گولیاں مارنے والا، میڈیا کی زبان بندی کرنے والے کے میڈیا سیمینار میں جانا ہے کہ نہیں، میڈیا کو فیصلہ کرنا ہوگا۔