کراچی (پاک صحافت) سندھ حکومت کی جانب سے خواتین کے لیے پہلی بس سروس کا آغاز کیا جارہا ہے جس میں مرد مسافروں کا داخلہ ممنوع ہوگا۔ یہ بس سرورس یکم فروری سے شروع کی جائے گی۔ ذرائع کے مطابق خواتین کیلئے مخصوص پنک بس سروس پہلے مرحلے میں کراچی کے دو روٹس پر چلائی جا رہی ہے۔
تفصیلات کے مطابق ایک روٹ ماڈل کالونی سے براستہ شاہراہ فیصل، میٹروپول، آئی آئی چندریگر روڈ سے میری ویدر ٹاور تک چلائی جا رہی ہے جبکہ دوسرا روٹ میری ویدر ٹاور سے صدر کے راستے ضلع سینٹرل تک جائے گا جو بعد میں چلایا جائے گا۔ خیال رہے کہ پنک بس سروس خواتین کے لئے مخصوص پاکستان کی پہلی پبلک ٹرانسپورٹ سروس ہوگی۔
واضح رہے کہ پنک بس سروس کیلئے ابتدائی مرحلے میں 8 بسیں حاصل کی گئی ہیں۔ پہلا روٹ کامیاب ہونے کی صورت میں دوسرے روٹ کے لئے بسیں تیار کی جائیں گیں۔ پنک بس سروس کا کرایہ 50 روہے ہوگا۔ محکمہ ٹرانسپورٹ سندھ نے پنک بس سروس کے لیے بسوں کی خریداری کرلی ہے۔ یہ بس کراچی پہنچ چکی ہیں اور سروس فراہم کرنے کے لیے تیار ہیں۔