اسلام آباد (پاک صحافت) نئے مالی سال کے بجٹ میں سرکاری ملازمین کی تنخواہوں میں 15 فی صد تک اضافے کا امکان ہے۔
تفصیلات کے مطابق وفاقی حکومت نئے مالی سال 2024-25ء کے وفاقی بجٹ میں سرکاری ملازمین کے لیے تنخواہوں میں 10 تا 15 فی صد اضافے پر غور کیا جا رہا ہے۔ اسی طرح ریٹائرڈ ملازمین کی پنشن میں بھی 10 فی صد تک اضافے کا امکان ہے۔
رپورٹ میں بتایا گیا ہے کہ ای او بی آئی میں بھی اضافے کی تجویز پر غور کیا جا رہا ہے۔ دوسری جانب حکومت قومی خزانے پر پنشن کے بوجھ میں کمی لانے کے لیے اصلاحات متعارف کرانے کی بھی تیاریاں کررہی ہیں۔
ذرائع کے حوالے سے رپورٹ میں کہا گیا ہے کہ وفاقی حکومت کی جانب سے اگلے مالی سال کے بجٹ آئی ایم ایف شرائط اور مہنگائی سمیت دیگر عوامل کو مدنظر رکھتے ہوئے ملازمین کی تنخواہوں میں اضافے کی تجاویز پر غور کیا جارہا ہے جس کے لیے صوبوں سے بھی مشاورت جاری ہے۔
آئندہ مالی سال 2024-25ء کے بجٹ میں تنخواہوں میں اضافے سے متعلق حتمی فیصلہ حکومتیں وزارت خزانہ کی سفارشات کا جائزہ لینے کے بعد کریں گی۔ اگر یہ اضافہ منظور ہوا تو جولائی 2024 سے نافذ العمل ہوگا۔