(پاک صحافت) شامی صدر نے اپنی سکیورٹی فورسز کے ہاتھوں سیکڑوں علویوں کی ہلاکت پر تعزیت کرتے ہوئے کہا کہ شام ایک قانون پر مبنی ملک ہے اور کوئی بھی اس سے بالاتر نہیں ہوگا اور وہ بے گناہوں کا خون بہانے کی اجازت نہیں دیں گے۔
تفصیلات کے مطابق شام کے صدر احمد الشعراء، جنہیں ابو محمد الجولانی کے نام سے جانا جاتا ہے، نے کہا ہے کہ اس قانون کا اطلاق تمام شامیوں پر یکساں طور پر کیا جائے گا اور سابقہ حکومت کے خلاف لڑائی کا بنیادی ہدف مظلوم لوگوں کی حمایت کرنا تھا۔ اپنی سیکورٹی فورسز کے ہاتھوں سینکڑوں علویوں کے قتل پر آنکھیں بند کرتے ہوئے انہوں نے دعوی کیا کہ ناحق بہائے گئے خون کا ایک قطرہ بھی ناقابل قبول ہے اور لوگوں کی جان و مال کی خلاف ورزی کو ایک سرخ لکیر سمجھا جاتا ہے جسے کسی فرد یا گروہ کو عبور کرنے کی اجازت نہیں ہے۔
ذرائع کے مطابق الشعراء نے اپنی بات جاری رکھتے ہوئے گزشتہ دو دنوں کے واقعات کا حوالہ دیتے ہوئے انہیں ملک کی راہ میں چیلنج قرار دیا اور اعلان کیا کہ ان کی حکومت موجودہ حالات کو بحال کرنے کی ہر ممکن کوشش کرے گی۔ انہوں نے اندرونی امن کو برقرار رکھنے اور قومی مفاہمت کو مضبوط بنانے کے لیے ایک کمیٹی کے قیام کا بھی اعلان کیا اور خبردار کیا کہ خونریزی مزید تشدد کو جنم دے گی۔