جنوبی افریقہ کی پارلیمنٹ میں آگ بھڑک اٹھی، عمارت کا ایک حصہ منہدم، کوئی جانی نقصان نہیں ہوا

کیپ ٹاؤن {پاک صحافت} جنوبی افریقہ کے دارالحکومت کیپ ٹاؤن میں پارلیمنٹ ہاؤس میں آگ لگ گئی جس سے پورے علاقے میں خوف وہراس پھیل گیا۔

حکام کے حوالے سے میڈیا رپورٹس کے مطابق پارلیمنٹ کی عمارت کا ایک حصہ گر گیا ہے۔ کیپ ٹاؤن کے میئر کمیٹی برائے سیکیورٹی کے رکن جے پی اسمتھ نے کہا ہے کہ پارلیمنٹ ہاؤس کی چھت کا ایک حصہ گر گیا ہے۔ انہوں نے کہا کہ عمارت میں آگ لگنے کی صورت میں وارننگ دینے کے لیے فائر الارم لگائے گئے ہیں لیکن الارم نے فائر وارننگ نہیں دی۔

جے پی اسمتھ نے کہا کہ جس علاقے میں آگ لگی وہاں فائر فائٹنگ کے بارہ آلات موجود تھے لیکن ملازمین کا کہنا ہے کہ ایسا لگتا ہے کہ الارم سسٹم نے دیر سے کام کرنا شروع کیا ہے۔

بی بی سی کے مطابق جنوبی افریقہ کی وزیر تعمیرات عامہ پارٹیشیا ڈی للی نے کہا ہے کہ ایوانِ صوبوں کی کونسل میں لگنے والی آگ پر قابو پالیا گیا ہے تاہم قومی اسمبلی کی عمارت میں لگی آگ کو بجھانا ابھی باقی ہے۔

پولیس آگ لگنے کی وجہ کی تحقیقات کر رہی ہے تاہم ابھی تک اس بارے میں کوئی اطلاع نہیں ملی ہے۔ واقعے میں ابھی تک کسی جانی نقصان کی کوئی خبر نہیں ہے، بتایا جا رہا ہے کہ چھٹی کا دن تھا اور پارلیمنٹ کا اجلاس نہیں تھا۔