(پاک صحافت) پاکستان شوبز انڈسٹری کے سینئر اداکار عدنان صدیقی نے مہنگے تحائف ملنے کے بارے میں انکشاف کیا ہے۔ عدنان صدیقی نے حال ہی میں ایک ٹی وی شو میں بطور مہمان شرکت کی جہاں میزبان نے ان سے سوال کیا کہ وہ کونسی ایک چیز ہے جس پر آپ زندگی میں کبھی بھی خرچہ نہیں کریں گے۔ اُنہوں نے اس سوال کا جواب دیتے ہوئے کہا کہ ایسی کوئی ایک چیز نہیں ہے ایسی بہت سی چیزیں ہیں جن پر خرچہ نہ کرنے کا میں نے خود سے وعدہ کیا ہے۔
اداکار نے بتایا کہ میں کبھی کسی کنسرٹ، کسی پارٹی یا کوئی کرکٹ میچ دیکھنے کے لیے پیسے دے کر نہیں جاتا۔ اُنہوں نے کہا کہ ایسی جگہوں پر لوگ انٹرٹین ہونے کے لیے جاتے ہیں تو میں انٹرٹینمنٹ کے لیے پیسے خرچ نہیں کروں گا۔ یہ جواب سننے کے بعد میزبان نے عدنان صدیقی سے یہ سوال پوچھا کہ ابھی تک زندگی میں گاڑی کے علاوہ آپ نے کونسی مہنگی چیز خریدی ہے؟ اُنہوں نے اس سوال کا جواب دیتے ہوئے کہا کہ آپ مجھ سے یہ پوچھیں کہ مجھے آج تک سب سے مہنگا تحفہ کیا ملا؟
جس پر میزبان نے فوراً کہا کہ چلیں آپ یہ بتا دیں کہ آپ کو آج تک سب سے مہنگا تحفہ کیا ملا؟ اداکار نے اس سوال کا جواب دیتے ہوئے کہا کہ مجھے آج تحفے میں سب سے مہنگی چیز گھڑی ملی ہے۔ یہ جواب سن کر میزبان نے ایک اور سوال کیا کہ یہ مہنگی گھڑی آپ کو سسرال والوں نے دی تھی؟ عدنان صدیقی نے ہنستے ہوئے جواب دیا کہ نہیں، یہ مہنگا تحفہ مجھے میرے دوست نے دیا تھا جسے میں نے توشہ خانے میں جمع کروانے کے بجائے اپنے پاس ہی رکھ لیا۔