(پاک صحافت) بالی ووڈ کی متنازع فنکارہ راکھی ساونت کی رمضان المبارک میں عمرہ ادا کرنے کی دیرینہ خواہش پوری ہو گئی۔ فوٹو اینڈ ویڈیو شیئرنگ پلیٹ فارم انسٹاگرام پر بھارتی رقاصہ نے مختلف ویڈیوز شیئر کی ہیں۔
حال ہی میں شیئر کی گئی ویڈیوز میں راکھی ساونت (فاطمہ) کو خانہ کعبہ کا طواف کرتے، غلاف کعبہ کو ہاتھ لگاتے اور مسجدالحرام کی حدود میں دعا کرتے دیکھ سکتے ہیں۔ اس موقع پر پاکستانی نوجوان سے شادی کی خواہش مند راکھی کو کراچی سے تعلق رکھنے والا بھائی بھی مل گیا، جس کے ساتھ انہوں نے سوشل میڈیا پر ویڈیو شیئر کی۔
مذکورہ ویڈیو میں انہیں یہ کہتے ہوئے سنا جاسکتا ہے کہ یہ میرا پاکستانی بھائی ہے جو مجھے روزانہ خانہ کعبہ کے سامنے سے، میرے لیے دعا کر کے ویڈیوز بھیجتا ہے، جس پر راکھی نے ان کا شکریہ بھی ادا کیا۔ اس ویڈیو میں انہوں نے پاکستانی نوجوان سے بات بھی کی جس پر پاکستانی شخص نے بتایا کہ اس کا تعلق پاکستان کے شہر کراچی سے ہے۔