اسلام آباد (پاک صحافت) وزیرِ اعظم شہباز شریف کی زیرِ صدارت ہونے والے اجلاس میں اتحادی جماعتوں نے فیصلہ کیا ہے کہ الیکشن ایک ساتھ ہونے ہیں یا علیحدہ علیحدہ اور کب ہونے ہیں، اس بات کا فیصلہ پارلیمنٹ کرے گی۔ یہ فیصلہ بھی کیا گیا کہ پاکستان تحریکِ انصاف کے ساتھ مذاکرات کرنے کی کوشش کی جائے گی۔
تفصیلات کے مطابق پاکستان تحریکِ انصاف (پی ٹی آئی) سے مذاکرات اور دیگر امور پر وزیرِ اعظم شہباز شریف کی زیرِ صدارت اتحادی رہنماؤں کا اجلاس ہوا۔ اجلاس میں مولانا فضل الرحمٰن، آصف علی زرداری، میاں افتخار، خالد مقبول صدیقی ، آفتاب شیر پاؤ، خالد مگسی، آغا حسن بلوچ شریک ہوئے۔ اجلاس میں چوہدری سالک حسین، طارق بشیر چیمہ، ساجد میر اور حافظ عبدالکریم بھی موجود تھے۔
واضح رہے کہ وفاقی وزیرِ اطلاعات و نشریات مریم اورنگزیب، وفاقی وزیرِ داخلہ رانا ثناء اللہ، وزیرِ خزانہ اسحاق ڈار، وفاقی وزیرِ قانون سینیٹر اعظم نذیر تارڑ، قمر زمان کائرہ، سردار ایاز صادق سمیت دیگر رہنما اور اٹارنی جنرل نے بھی اجلاس میں شرکت کی۔ ذرائع کا کہنا ہے کہ حکومتی اتحادی جماعتوں نے اجلاس میں فیصلہ کیا کہ سپریم کورٹ کا کام آئین و قانون کے مطابق فیصلے کرنا ہے، ثالثی کرانا نہیں، ثالثی کا کردار اور بات چیت کا فورم پارلیمنٹ ہے۔