اسلام آباد (پاک صحافت) وفاقی وزیر ماحولیاتی تبدیلی شیری رحمٰن نے کہا ہے کہ ابھی حالات بہتری کی طرف گامزن ہیں، امید ہے 2023 میں ہم سابق حکومت کے پیدا کردہ بحرانوں سے مکمل نکل آئیں گے۔ شیری رحمان نے کہا کہ سال 2023 کے لیے ہم سب کو پُرامید ہونا چاہیے، دعا ہے نیا سال ملک اور قوم کے لیے استحکام، ترقی، خوشحالی اور خوشیوں کا سال ہو۔
تفصیلات کے مطابق وفاقی وزیر اطلاعات شیری رحمان نے جاری بیان میں نئے سال پر اہل وطن کو مبارکباد دیتے ہوئے کہا کہ سال 2022 پاکستان کے لیے بہت مشکلات کا سال رہا۔ ان کا کہنا ہے کہ تاریخی سیلاب، ماحولیاتی تبدیلی کے بدترین اثرات پر پاکستان دنیا کی توجہ کا مرکز رہا، برساتی، نہری سیلاب کے باعث ملک کا چوتھائی حصہ اور 3 کروڑ 30 لاکھ سے زائد لوگ متاثر ہوئے۔
واضح رہے کہ پیپلز پارٹی کی رہنما نے جاری بیان میں مزید کہا کہ 17 سو سے زائد اموات ہوئیں، گھروں، سڑکوں اور بنیادی ڈھانچے کو شدید نقصان ہوا، ماحولیاتی بحران کے باعث ایسی تباہ کاریوں کی مثال حالیہ تاریخ میں نہیں ملتی۔ ان کا کہنا ہے کہ ان سردیوں میں ابھی بھی ہمارے لاکھوں بھائی بہنیں بےگھر زندگی گزار رہے ہیں، نئے سال میں لوگوں کو پیغام ہے سیلاب متاثریں کی مکمل بحالی میں ان کا ساتھ دیں۔