کراچی (پاک صحافت) شرجیل میمن کا کہنا ہے کہ عمران نیازی اداروں اور ملک کیخلاف گھناونی سازش کررہے ہیں۔
تفصیلات کے مطابق وزیر ٹرانسپورٹ سندھ شرجیل میمن نے کہا ہے کہ عمران خان و دیگر پی ٹی آئی رہنما اداروں کی شرافت کا ناجائز فائدہ اٹھا رہے ہیں، عمران خان جو غیراخلاقی زبان، جھوٹے بہتان مخالفین پر لگاتے تھے، وہی زبان معزز جج صاحبان، الیکشن کمشنر کے خلاف استعمال کرتے تھے، اب وہی زبان افواج پاکستان کے سینئر افسران کیخلاف استعمال کررہے ہیں۔
شرجیل میمن کا مزید کہنا ہے کہ عمران خان کا مقصد ہر ادارہ ان کی ٹائیگر فورس کی طرح کام کرے، ان کی غلامی کرے، چیئرمین پی ٹی آئی نے اپنے ناپاک عزائم کو ختم نہ کیا تو عوام انہیں کبھی معاف نہیں کرے گی۔ پوری قوم عدلیہ، افواج، الیکشن کمیشن کے ساتھ سیسہ پلائی دیوار کی طرح کھڑی ہے، عمران خان نے جتنی بھی حدیں پار کیں اس کی واحد وجہ مسلسل ڈھیل ہے، عمران خان کے ساتھ لاڈلے والا سلوک رکھا گیا۔