اسلام آباد (پاک صحافت) وفاقی وزیر منصوبہ بندی و ترقی احسن اقبال نے کہا ہے کہ آئی ایم ایف حکام سے ملاقات ہوئی ہے، امید ہے پاکستان کے لیے آئی ایم ایف کا پروگرام جلد شروع ہو جائے گا۔
تفصیلات کے مطابق امریکی سفارتخانے میں صحافیوں سے گفتگو کرتے ہوئے احسن اقبال کا کہنا تھا کہ آئی ایم ایف کا پروگرام جلد بحال ہونے کی امید ہے۔ وفاقی وزیر کا کہنا تھا کہ آئی ایم ایف پروگرام میں جون 2023 تک توسیع کی بھی امید ہے، آئی ایم ایف کا پروگرام ٹریک پر آنا خوش آئند ہے، فیٹف میں بھی وائٹ لسٹ میں آ جائیں گے۔
واضح رہے کہ اس موقع پر وفاقی وزیر احسن اقبال نے مزید کہا کہ سیاسی و معاشی استحکام کے لیے پاکستان کی پالیسیوں کا تسلسل لازمی ہے، یوکرین کی صورتحال کی وجہ سے پاکستان کی معیشت سب سے زیادہ متاثر ہوئی ہے، عالمی برادری یوکرین کی صورتحال کے نتیجے میں ترقی پذیر ملکوں کی مشکلا ت کا ادراک کرے۔