اسلام آباد (پاک صحافت) ملک بھر میں کورونا وائرس کے بڑھتے ہوئے کیسز کے پیش نظر کورونا ویکسین نہ لگوانے والوں پر ہوائی سفر کے لئے پابندی عائد کردی گئی ہے۔
تفصیلات کے مطابق سول ایوی ایشن حکام کا کہنا ہے کہ یکم اگست سے تاحکم ثانی اندرون ملک فضائی سفر کے لئے ویکسی نیشن لازمی قرار دی گئی ہے۔ 18 سال سے زائد عمر کے افراد ویکسی نیشن کے بغیر اندرون ملک سفر نہیں کرسکیں گے، بیرون ملک سفر کرنے والے اور غیرملکی شہری بھی پابندی سے مستثنیٰ ہوں گے۔
دوسری جانب پابندی پر مکمل عمل درآمد کو یقنینی بنانے کے لیے ملک کے تمام ہوائی اڈوں پر مسافروں کے ٹکٹ کے ساتھ اْن کے ویکسین سرٹیفیکٹ بھی چیک کیے جانے لگے ہیں۔ ویکسین سرٹیفیکٹ کی جانچ کے بعد ہی مسافروں کو بورڈنگ پاس جاری کیے جائیں گے۔ اس کے علاوہ مسافروں کو ماسک پہننے اور سماجی فاصلے کو برقرار رکھنے کی بھی ہدایت کی جارہی ہیں۔