اسلام آباد (پاک صحافت) وفاقی وزیر اطلاعات و نشریات عطا تارڑ نے کہا کہ دہشت گردوں کے ہینڈلرز اور سپورٹرز کا تعاقب کیا جائے گا۔
تفصیلات کے مطابق میڈیا سے گفتگو کرتے ہوئے وفاقی وزیر اطلاعات و نشریات عطا تارڑ نے کہا کہ اللہ کا شکر ہے کہ دہشت گردوں کے خلاف آپریشن مکمل ہو گیا ہے، آپریشن کے دوران 33 دہشت گردوں کو ہلاک کیا گیا، آپریشن کے دوران 4 ایف سی کے جوان شہید ہوئے۔ خودکش بمباروں نے مسافروں کو انسانی ڈھال بنایا ہوا تھا، ان کے خاتمے سے بی ایل اے، بھارتی میڈیا اور پی ٹی آئی کے جھوٹے بیانیے کو بھی شکست ہوئی۔
عطا تارڑ کا مزید کہنا تھا کہ دہشت گردی کے ناسور کو جڑ سے اکھاڑیں گے، پاکستان کو امن کا گہوارا بنائیں گے، بی ایل اے کے دہشت گردوں کی سازش ناکام ہوئی، بی ایل اے کے دہشت گرد کبھی کامیاب نہیں ہوں گے، وزیراعظم کل بلوچستان کا دورہ بھی کریں گے۔ جعفر ایکسپریس میں 440 مسافر سوار تھے، ہم بڑے سانحے سے بچ گئے، بلوچستان میں جاری آپریشن منطقی انجام کو پہنچ گیا، فائنل آپریشن سے پہلے 4 ایف سی جوان شہید ہوئے۔
انہوں نے کہا کہ بھارتی میڈیا نے جعفر ایکسپریس ٹرین کے واقعے پر بہت پروپیگنڈا کیا، پاکستان میں بعض سیاسی عناصرنے اس واقعے کو اپنی سیاست چمکانے کے لیے استعمال کیا، بھارتی میڈیا، بی ایل اے اور پی ٹی آئی نے اس واقعے پ رایک زبان بولی ہے۔