لاہور (پاک صحافت) گورنر پنجاب سردار سلیم حیدر خان سے وفاقی وزیر خزانہ سینیٹر محمد اورنگزیب کی ملاقات ہوئی، ملاقات میں اقتصادی ترقی، چیلنجز، زراعت کے شعبے کے فروغ پر تبادلہ خیال کیا گیا۔
تفصیلات کے مطابق گورنر پنجاب سردار سلیم حیدر نے کہا کہ پیپلز پارٹی اور ن لیگ ملکی ترقی کی خاطر ایک پیج پر ہیں، سابق حکومت کی ناقص پالیسیوں کی وجہ سے ملک کا بہت نقصان ہوا۔ پیپلز پارٹی حکومت کی اچھی پالیسیوں میں اس کے شانہ بشانہ کھڑی ہوگی، معیشت کی بحالی میں وزیراعظم اور صدر پاکستان کا کردار قابل ستائش ہے۔
ذرائع کے مطابق گورنر پنجاب سلیم حیدر کا مزید کہنا تھا کہ پاکستانی معیشت نے گزشتہ سال پیش شدید چیلنجز کے باوجود نمایاں بہتری حاصل کی ہے۔ وفاقی وزیر خزانہ سینیٹر محمد اورنگزیب نے کہا کہ ملکی ترقی کے لئے گورنر پنجاب کا کاروباری برادری اور مقامی چیمبرز کے ساتھ روابط قابل تحسین ہیں۔
سینیٹر محمد اورنگزیب کا کہنا تھا کہ ملک کی معیشت کے فروغ میں نجی شعبہ، بالخصوص کاروباری برادری کلیدی کردار ادا کرسکتی ہے۔ وفاقی وزیر خزانہ نے کہا کہ ملکی معیشت کو مستحکم اور پائیدار ترقی کی راہ پر گامزن کرنے میں سیاسی قیادت وزیر اعظم شہباز شریف کا کردار اہم ہے۔