لاہور (پاک صحافت) پنجاب اسمبلی میں سی پی اے ساؤتھ ایشیا ریجنل کانفرنس کروانے پر تعریفی قرارداد متفقہ طورپر منظور کر لی گئی۔
تفصیلات کے مطابق پنجاب اسمبلی میں سی پی اے کانفرنس کامیاب انعقاد پر تعریفی قرارداد ارکان اسمبلی سارہ احمد اور مہوش سلطانہ نے پیش کی۔ قرارداد کے متن کے مطابق سپیکر ملک محمد احمد خان کی قیادت میں پنجاب اسمبلی میں سی پی اے بین الاقوامی کانفرنس کا انعقاد کیا گیا جس سے پاکستان کا دنیا میں مثبت کردار سامنے آیا۔
ذرائع کے مطابق سی پی اے کانفرنس کے انعقاد سے موسمیاتی تبدیلی، اے آئی اور محروم طبقوں سمیت دیگر مسائل پر سیر حاصل گفتگو کی گئی، کانفرنس میں مالدیپ ، ملائیشیا اور برطانیہ، سری لنکا سمیت دیگر ممالک کے سپیکرز اور ڈپٹی سپیکرز نے شرکت کی۔
قرارداد کے مطابق پنجاب حکومت کی شاندار مہمان نوازی کے بارے میں آنے والے مہمانوں نے مثبت تاثر کا اظہار کیا، چارٹر آف لاہور جیسے منطقی نکات کو دنیا کے سامنے پیش کیا گیا۔ کامیاب سی پی اے کانفرنس کا سہرا سپیکر ملک محمد احمد خان اور وزیر اعلی پنجاب کو جاتا ہے۔