بانی کو معافی وزیراعظم سے ملنی ہے کسی اور جگہ سے نہیں۔ حنیف عباسی

راولپنڈی (پاک صحافت) مسلم لیگ ن کے رہنما حنیف عباسی نے کہا کہ بانی کو معافی وزیراعظم سے ملنی ہے کسی اور جگہ سے نہیں۔

تفصیلات کے مطابق مسلم لیگ (ن) کے رہنما حنیف عباسی نے کہا ہے کہ عالمی ادارے پاکستان کی معاشی بہتری کا اعتراف کر رہے ہیں، حکومتی اقدامات سے ملک ترقی کی راہ پر گامزن ہے، عوام نے انتشار اور فساد کی سیاست کو مسترد کر دیا ہے۔ اب بانی پی ٹی آئی منت ترلوں پر آگئے ہیں، بانی پہلے قوم سے معافی مانگیں، بانی پی ٹی آئی نے ملکی سالمیت پر حملے کیے، ان کے ہینڈلرز نے ان کو خطوط لکھنے کی لائن دی ہے۔

رہنما ن لیگ حنیف عباسی کا مزید کہنا تھا کہ یہ خطوط کے ذریعے دوبارہ فوج پر حملہ آور ہوئے، 9 مئی کو حساس مقامات کو جلایا گیا، بانی پی ٹی آئی اور ان کے ہینڈلرز کامیاب نہیں ہوں گے۔

انہوں نے کہا کہ سرمایہ کاروں کا پاکستان پر اعتماد بڑھ رہا ہے، برآمدات اور ترسیلات زر میں اضافہ ہو رہا ہے، کسی کو ملکی مفادات کے خلاف کام کرنے کی اجازت نہیں دی جاسکتی۔