اسلام آباد (پاک صحافت) محمد اورنگزیب نے کہا ہے کہ چینی صنعتوں کی پاکستان منتقلی کے امکانات پر توجہ ہوگی۔ پاکستان اور چین کے درمیان سرسبز و طویل مدتی شراکت داری قائم ہے۔
تفصیلات کے مطابق ڈیووس میں چینی میڈیا سے گفتگو میں وفاقی وزیر خزانہ محمد اورنگزیب نے کہا ہے کہ چین نے سرمایہ کاری، ٹیکنالوجی، علوم کی منتقلی میں پاکستان کا ساتھ نبھایا ہے، پاکستان کو چینی صنعتوں کےلیے برآمدی مرکز بنانے کی کوشش ہو گی۔
ذرائع کے مطابق محمد اورنگزیب کا مزید کہنا تھا کہ سی پیک سیکنڈ فیز میں باہمی کاروباری شراکتوں کے ثمرات نمایاں ہوں گے، اس فیز میں چینی صنعتوں کی پاکستان منتقلی کے امکانات پر توجہ ہوگی۔ ہماری کوشش ہے کہ اسی سال پانڈا بانڈ کا اجرا ہو جائے، ہم چینی کیپٹل مارکیٹ تک رسائی کے لیے کوشاں ہیں۔
انہوں نے کہا کہ پہلے ایف ڈی آئی ڈیجیٹل انیشی ایٹو کا پاکستان کے لیے اجرا ہمارے لیے اعزاز کی بات ہے، ہم دوسروں کے تجربات سے سیکھ کر پاکستان کے آئی ٹی شعبے کو آگے لے جانے کے خواہاں ہیں۔