اسلام آباد (پاک صحافت) رہنما مسلم لیگ ن بیرسٹر عقیل نے کہا ہے کہ عمران خان زہر آلود گفتگو کریں گے تو مذاکرات متاثر ہوں گے۔
تفصیلات کے مطابق بیرسٹر عقیل ملک نے کہا ہے کہ ہمیں مذاکرات کیلئے کسی کا دباؤ نہیں ہے، ہم پاکستان کے لیے مذاکرات کر رہے ہیں، کسی کا دباؤ نہیں نہ ہی کسی نے پی ٹی آئی سے مذاکرات کا کہا ہے۔ غلامی نہ منظور کا نعرہ لگانے والوں کو سٹیٹ ڈیپارٹمنٹ نےبھی واضح جواب دے دیا ہے، ہمارے کیمپ سے دباؤ کی بات کرنے والوں کو سنجیدہ نہیں لینا چاہیے۔
عقیل ملک کا مزید کہنا تھا کہ بانی پی ٹی آئی نے وزیراعظم کےخلاف نازیبا گفتگو کی ہے، اگر زہر آلود بیانات آئیں گے تو مذاکرات کا عمل متاثرہو گا، مریم نواز نے کسی سیاسی جماعت کا نام تو نہیں لیا، مریم نواز کے بیان کو غلط رنگ دیا جا رہا ہے۔
انہوں نے کہا کہ پی ٹی آئی کے مطالبوں میں الیکشن کی کوئی بات ہی نہیں ہے، ملک ابھی کسی صورت بھی قبل ازوقت الیکشن کا متحمل نہیں ہوسکتا، بانی پی ٹی آئی ڈیل مانگ رہے ہیں جو ہم آفر نہیں کرسکتے۔