سیاسی جماعتوں کے مذاکرات سے معاملات بہتر ہوتے ہیں۔ اعظم نذیر تارڑ

اسلام آباد (پاک صحافت) وفاقی وزیر قانون اعظم نذیر تارڑ نے کہا کہ سیاسی جماعتوں کے آپس میں بیٹھنے سے معاملات بہتر ہوتے ہیں۔

تفصیلات کے مطابق اعظم نذیر تارڑ نے کہا ہے کہ سپیکر قومی اسمبلی ایاز صادق ہمیشہ صلح جوئی کی بات کرتے ہیں، سپیکر قومی اسمبلی کا ڈائیلاگ کیلئے کمیٹی بنانے کا اچھا فیصلہ ہے۔ ایاز صادق نے وزیراعظم سے کہا ڈائیلاگ ہونے چاہئیں، گفت و شنید ڈائیلاگ بات چیت یہی سیاست کا نام ہے، دھرنے، مارکٹائی یہ سیاست نہیں ہے۔

وفاقی وزیر قانون اعظم نذیر تارڑ کا مزید کہنا تھا کہ پارلیمنٹ میں اپوزیشن اور حکومتی اتحاد موجود ہے، ہمیں عزت کرنی چاہیے، حکومتیں آتی جاتی ہیں ہم سب کا ایک ٹارگٹ پاکستان کی ترقی اور خوشحالی ہونا چاہیے۔

انہوں نے کہا کہ آپس میں بیٹھنے سے معاملات بہتر ہوتے ہیں، ہم پہلے بھی بات کرتے تھے کہ پارلیمنٹ کے فلور سے بات کی جائے۔