نارووال (پاک صحافت) وفاقی وزیر منصوبہ بندی احسن اقبال نے کہا ہے کہ دھرنے پاکستان کی معیشت کے لیے زہر ہیں۔
تفصیلات کے مطابق میڈیا سے گفتگو کرتے ہوئے احسن اقبال نے کہا ہے کہ 24 نومبر کو اسلام آباد میں دھرنے کی کال دی گئی، جس دن کال دی سٹاک مارکیٹ چار ہزار پوائنٹس گرگئی، جس دن وہ جوتیاں چھوڑ کر بھاگے سٹاک مارکیٹ اوپر گئی۔
انہوں نے کہا کہ جب دھرنا ناکام ہوا تب معیشت اوپر کی طرف گئی، دھرنے پاکستان کی معیشت کے لیے زہر ہیں، پاکستان کو امن و استحکام کی ضرورت ہے، ہمیں پالیسیوں میں تسلسل کی ضرورت ہے۔
وفاقی وزیر منصوبہ بندی کا کہنا تھا کہ گزشتہ 77 سالوں میں پاکستان میں سیاسی استحکام نہیں رہا، حکومتوں کو چلنے نہیں دیا گیا، جب ملک ترقی کرنے لگتا ہے تو ٹانگیں کھینچی جاتی ہیں، 2018 میں ایک اناڑی، ضدی شخص کو مسلط کیا گیا۔
احسن اقبال کا مزید کہنا تھا کہ جب ہم نے اقتدار سنبھالا تو ملک تقریبا دیوالیہ ہوچکا تھا، حکومتی اقدامات کی وجہ سے آج مہنگائی کم ہو رہی ہے، مہنگائی 38 فیصد کی رفتار سے بڑھ رہی تھی، آج مہنگائی کی شرح ساڑھے چھ فیصد پر آگئی ہے۔