اسلام آباد (پاک صحافت) وفاقی وزیر داخلہ محسن نقوی نے کہا ہے کہ اسلام آباد میں دفعہ 144 نافذ ہے، خلاف ورزی کرنے والوں کے خلاف آپریشن ہوگا۔
تفصیلات کے مطابق میڈیا سے گفتگو کرتے ہوئے وزیر داخلہ محسن نقوی نے کہا ہے کہ اسلام آباد ہائی کورٹ کا آرڈر سب نے پڑھ لیا ہے، عدالت حکم میں واضح لکھا ہے، اسلام آباد میں کسی کو جلسے، جلوس، مارچ اور دھرنے کی اجازت نہیں، ہم ہائی کورٹ کے آرڈر پر من و عن عملدرآمد کریں گے، کسی کو اسلام آباد ہائی کورٹ کے آرڈر کے بغیر جلسہ جلوس کرنے کی اجازت نہیں دیں گے۔
انہوں نے کہا کہ آج شام وزیراعظم جس طرح گائیڈ کریں گے بالکل اسی طرح کریں گے، اگر یہ دھرنے کیلئے آنے کی کوشش کریں گے تو بہت مشکل ہوجائے گی، نقصان کے ذمہ دار وہ لوگ ہوں گے جو آرڈر کی خلاف ورزی کر کے دھاوا بولنے کیلئے آرہے ہیں، میرا اڈیالہ سے کوئی رابطہ نہیں۔
محسن نقوی کا مزید کہنا تھا کہ میں خود کہتا ہوں موبائل سروس، دکانیں اور نہ سڑک بند نہیں ہونی چاہیے، پاراچنار میں جو کل ہوا ،اس سے زیادہ افسوسناک واقعہ نہیں ہوسکتا، کے پی میں لاء اینڈ آرڈر کی ذمہ داری وہاں کی حکومت کی ہے، خیبرپختونخوا حکومت خود ہم پر دھاوا بولنے آرہی ہے، یہاں جنازے ہورہے ہیں اور دوسری جانب دھاوا بولنے کی تیار ہورہی ہے۔
انہوں نے کہا کہ ایک جانب 40 سے زائد جنازے اٹھ رہے ہیں، دوسری جانب دیکھ لیں کیا ہورہا ہے، اتنے بڑے واقعے کے بعد ان کو خود سوچنا چاہیے کہ کیا کرنا چاہیے اور کیا نہیں۔