اسلام آباد (پاک صحافت) خارجی نور ولی محسود کا چھپ کر پاکستان میں داخل ہونے کا منصوبہ آشکار ہوگیا ہے۔
تفصیلات کے مطابق فتنہ الخوراج کا سرغنہ خارجی نور ولی چھپ کر پاکستان آنے کی تیاریاں کر رہا ہے، خارجی نور ولی شوال کی جانب سے پاکستان میں چھپ کر داخل ہو کر ایک ویڈیو ریکارڈ کرائے گا، ویڈیو ریکارڈ کرانے کا مقصد یہ بتانا ہوگا کہ وہ پاکستان میں ہے جبکہ ویڈیو کو ریلیز اس وقت کیا جائے گا جب وہ افغانستان واپس بھاگ چکا ہوگا۔
ذرائع کے مطابق یہ بات بھی خارج از امکان نہیں کہ وہ افغاستان میں ہی ویڈیو ریکارڈ کروا کر اسے پاکستان میں ہونے کا دعوی کر دے، اس سے قبل 13 نومبر 2024 کو خارجی نور ولی کی آڈیو لیک منظر عام پر آئی جس میں وہ نچلے درجے کے دہشتگردوں کو واپس نہ آنے کی دھمکی دے رہا ہے۔
ذرائع کا بتانا ہے کہ 13 اور 14 نومبر کی درمیانی شب خارجی نور ولی اور حاجی گل بہادر گروپ کی آپس کی لڑائی میں خودکش حملے میں 5 دہشتگرد جہنم واصل ہوگئے تھے۔
دفاعی ماہرین کے مطابق خارجی نور ولی کا پاکستان میں چھپ کر داخل ہونا بھی گزشتہ پے در پے واقعات میں ناکامی کی وجہ سے دوسرے دہشت گردوں کی طرف سے آنے والے پریشر کا شاخسانہ لگتی ہے، سکیورٹی فورسز کی فتنہ الخوراج کیخلاف کامیاب کارروائیوں نے خارجی نور ولی کو حواس باختہ کردیا ہے۔
پاک فوج کے روزانہ کی بنیاد پر انٹیلی جنس بیسٹڈ آپریشنز نے فتنہ الخوراج کو بھاری جانی و مالی نقصان پہنچایا، ان نقصانات کی بدولت فتنہ الخوراج کی صفوں میں مایوسی کی لہر دوڑ گئی ہے۔