لاہور (پاک صحافت) پنجاب میں سموگ کے پیش نظر مزید پابندیاں لگا دی گئی ہیں ڈی جی محکمہ ماحولیات نے لاہور اور ملتان میں یونیورسٹیز اور کالجز بند کر دیں۔
ڈی جی ماحولیات کی جانب سے جاری کردہ نوٹیفکیشن کے مطابق لاہور اور ملتان میں یونیورسٹیز اور کالجز بند رہیں گے، یونیورسٹیز اور کالجز کو آن لائن کلاسز پر منتقل کردیا گیا، مری کے علاوہ تمام اضلاع کے سکولز 24 نومبر تک بند رہیں گے، لاہور اور ملتان میں تمام تعمیراتی کاموں پر مکمل پابندی ہوگی۔
نوٹیفیکشن کے مطابق قومی سطح کے تعمیراتی کاموں کو اجازت ہوگی، ہیوی ٹریفک کی لاہور اور ملتان میں داخلے پر مکمل پابندی ہوگی، اینٹوں کے بھٹے، فرننس انڈسٹری کے کام پر بھی بندش ہوگی، لاہور اور ملتان میں ریسٹورینٹس صرف 4 بجے تک کام کریں گے، ریسٹورنٹس کو 4 سے 8 بجے تک ٹیک اوے کی اجازت ہوگی۔
لاہور اور ملتان میں ڈاکٹرز، نرسز، پیرامیڈیکل سٹاف کی چھٹیاں منسوخ کردی گئی ہیں، لاہور اور ملتان میں تمام ہسپتالوں کی او پی ڈیز رات 8 بجے تک کام کریں گی، ریسکیو 1122 سموگ متاثرہ مریضوں کی معاونت کرے گا، 8 بجے کے بعد ریسٹورنٹس مکمل بند رہیں گے، تمام فیصلوں کا اطلاق 16 نومبر سے 24 نومبر تک ہوگا۔