اسلام آباد (پاک صحافت) وفاقی وزیر امیر مقام نے کہا ہے کہ مسئلہ کشمیر کا سلامتی کونسل کی قراردادوں کے مطابق حل چاہتے ہیں۔
تفصیلات کے مطابق کشمیری رہنماؤں کے ہمراہ پریس کانفرنس کرتے ہوئے امیر مقام نے کہا ہے کہ بھارت نے مقبوضہ کشمیر پر غیر قانونی قبضہ کر رکھا ہے،27 اکتوبر 1947 کو بھارتی فوج مقبوضہ جموں کشمیر میں داخل ہوئی۔ مسئلہ کشمیر کا سلامتی کونسل کی قراردادوں کے مطابق حل چاہتے ہیں، انسانی حقوق کی بات کرنے والوں کو مقبوضہ کشمیر میں مظالم نظر کیوں نہیں آتے؟ مسئلہ کشمیر کشمیری عوام کے امنگوں کے مطابق حل کیا جائے۔
وفاقی وزیر کا مزید کہنا تھا کہ کشمیریوں کی بہادری کو سلام پیش کرتے ہیں، کشمیری آج بھی آزادی کیلئے قربانیاں دے رہے ہیں، ظلم اور جبر سے کشمیریوں کی آواز نہیں دبائی جاسکتی، پاکستان نے ہمیشہ مسئلہ کشمیر کو ہر فورم پر اجاگر کیا۔
امیر مقام نے کہا کہ تمام سیاسی قیادت مسئلہ کشمیر پر متحد ہے،لاکھوں کی تعداد میں بچے یتیم ہوئے لیکن کوئی ان کی آواز نہیں دبا سکا، اقوام متحدہ مسئلہ کشمیر کے حل کیلئے اپنا کردار ادا کرے۔