اسلام آباد (پاک صحافت) وزیر خزانہ محمد اورنگزیب کا کہنا ہے کہ آئی ایم ایف دوست ممالک کی یقین دہانیوں سے مطمئن ہوگیا ہے۔
تفصیلات کے مطابق وزیر خزانہ محمد اورنگزیب نے کہا دوست ممالک نے آئی ایم ایف کو پاکستان کا قرض رول اوور کی یقین دہانی کرائی ہے۔ آئی ایم ایف دوست ممالک کی یقین دہانیوں سے مطمئن ہوگیا۔ یقین دہانیوں کے بعد آئی ایم ایف نے اجلاس بلایا ہے۔
ذرائع کے مطابق وزیر خزانہ محمد اورنگزیب کا مزید کہنا تھا کہ آئی ایم ایف قرض کی ساری رقم یکمشت نہیں دے گا۔ آئی ایم ایف اقساط میں رقم فراہم کرے گا جس کیلئے شرائط کو پورا کرنا ہوگا۔ سب سے مشکل پاور سیکٹر اصلاحات ہیں، آئی ایم ایف کے ساتھ 7 ارب ڈالر کا پروگرام ہے، پاکستان کی مجموعی ضروریات 12 ارب ڈالر کی ہیں، آئی ایم ایف قرض کے علاوہ 5 ارب ڈالر اضافی فنانسنگ کی ضرورت ہوگی۔
انہوں نے کہا کہ آئی ایم ایف 5 ارب ڈالر دیگر عالمی مالیاتی اداروں سے حصول میں مدد دے گا۔ سعودی عرب آئل فیسیلیٹی میں 1.2 ارب ڈالر دے گا جس کی شرح سود طے کی جا رہی ہے۔