جب اقتدار میں تھے تو آرمی چیف باپ اور ڈی جی آئی ایس آئی چاچا تھا۔ خواجہ آصف

اسلام آباد (پاک صحافت) خواجہ آصف نے پاکستان تحریک انصاف کو اپنے طنز کا نشانہ بناتے ہوئے کہا ہے کہ یاد کرو جب اقتدار میں تھے تو آرمی چیف باپ اور ڈی جی آئی ایس آئی چاچا تھا۔

تفصیلات کے مطابق سوشل میڈیا پلیٹ فارم ”ایکس“ پر 9 مئی کیسز میں گرفتار افراد کے حوالے سے ایک ویڈیو شیئر کرتے ہوئے خواجہ آصف نے لکھا کہ اس طرح نہیں کہ جب چاہا وطن کی اساس پہ حملہ آور ہو جاؤ، سیاسی اختلافات کو وطن دشمنی بنا ڈالو۔ پھر معافی مانگ کر معصوم بن جاؤ اور پارٹی چھوڑ دو۔

خواجہ آصف نے لکھا کہ کوئی روپوش ہوگیا، کوئی مفرور ہوگیا۔ کہاں گئے جو اسمبلی میں اگلی قطاروں میں بیٹھتے تھے اور وزیر مشیر تھے، جن کی تکبر اور رعونت سے بھری تقاریر اسمبلی کے ریکارڈ میں محفوظ ہیں۔

انہوں نے مزید لکھا کہ یاد کرو جب اقتدار میں تھے تو آرمی چیف باپ تھا، ڈی جی آئی ایس آئی چاچا تھا، ساری مسلم لیگ ن اور پیپلزپارٹی کو جیل بھیج دیا جلا وطن کردیا تھا۔ اللہ نے حوصلہ دیا ہمت دی عزت رکھی اور اللہ نے اقتدار عطا کیا۔